तापी थायनेरमा घुरमयनी! - बापूसाहेब हटकर, अहिरानी साहित्यिक
😭🌊😭🎤😭🌊😭🎤😭🌊😭🎤😭
*
*
♾️♾️♾️♾️♾️♾️♾️♾️♾️♾️♾️♾️♾️
एक सावा षण्मुखानंद हॉल मुंबईमा जागतिक मराठी परिषद भराई व्हती. तठे पु ल देशपांडे यासनी भाषण कर व्हत. म्हणे, *"माले जर कोनी ईचार का आभायमा देवबा से का नही? ते मी त्याले सांगसू भाऊ आभायमा देवबा से का नही माले काय म्हाईत नही भो, पन आभायमा, चांद से सुऱ्या से नी लताना आवाज से."* त्या लतान मम्हार(मायन मायेर मराठीमा आजोळ) आपला खान्देशना तपेतना काठवर थायनेरमा से. आज तापी थायनेर मा घुरमई ऱ्हाईनी का की, भारत रत्न लता दीदी आज सव फेब्रुवारी 2022 ले आपले सोडी गै कायमनी. ती काय आते मांगे फिरी येवाव नही.
मास्टर दीनानाथ मंगेशकर या मूळ गोवाना मंगेशीना ऱ्हानार व्हतात. संगीत रंगभूमीना काळ म्हाना सुवर्ण युगना त्या गायक नट व्हतात. गोड आवाज नी सुंदर रूप याना मुये मास्टर दीनानाथ नाटकमा आस्तुरी कलाकारनी भूमिका करेत. त्याज कायमा थायनेरमा गुजराथी कुयन एक अहीर शिपा कुटूंब ऱ्हाय. त्यासले नर्मदा नी शुद्धमती नावंन्या दोन पोरी हत्यात. मोठी नर्मदा इना संगे मास्टर दीनानाथ यासन सकपन झाय, नी लगीन व्हताज दीनानाथ नवरी थायनेरमा ठिसनी नाटकना कुरता इंदूर न्हीगी ग्यात. हायदना आंगनी नवी जुवान पोर, काय तरी आजार उमयनानी नर्मदा एकाएकी जात ऱ्हायनी.
हाई बातनी आयकीस्नि मास्टर दीनानाथ इंदूरथुन थायनेरले ग्यात. सासुसासरा नी जवई एराएरले भेटनात. नर्मदानी याद काढी रडनात कुडणात. मनम्हाना आडका भडका न्हीगना. बठ शांत व्हवावर सासरानी दुसरी दिन दिनानाथले बोलनात, *"जवाई हाई दखा भगवानजीनी आमन्या व्हती ते घडी गे, त्यांना पुढे काई चालत नही. नर्मदा इतलाज दिननी सोबतीनं व्हती. आते मनी रावनाई से मनी हाई धाकाली आंडेर से शुद्धमती. ती बी न्हाती धोती समजदार से इले पदरमा ली ल्या.*
मा दीनानाथ यासनी सासराना सबदले मान दिना नी शुद्धमतीले थायनेर म्हाइन परनी इंदूर लै ग्यात. पुढे हाईज आपली खान्देश कन्या शुद्धमती *माई मंगेशकर* म्हणीसनी परसिद्ध झायी. तठे त्यासना सवसार फुलनां उमलाना. नी 28 सप्टेंबर 1927 ले त्यासना पोटे पहिली आंडेर उनी ती लता दीदी. *पहिली कन्या नी दारसे दुन्या* म्हण से अहिराणीमा वडीलनी, नी मंग तसज झाय, बठी दुन्या मंगेशकर घरांनाना दारसे उभी ऱ्हायनी पन हाई यश दखाले मास्टर दीनानाथ हायात नही व्हतात.
मोठी लता दीदी. तीन पाठवर आशा, मंग उषा, तीन मांगे मीना नी चार बहिनीसना पाठवर हृदयनाथ हाऊ भाऊ उना. यासले संगीतना वारसा दिसनी बाप सर्गे ग्या. नी मंग त्यासना जगांना संघर्ष सुरू झाया. माई काय सादीभादी नही व्हती. खान्देशना माटीनी पोर ती, कंबरले पदर खोसी कामवर लटकनी. बठा पोरे तिनी संगीत क्षेत्रमा तयार करात. भगवानजीनी गोड गया देयलज व्हता. पाची पोरं नखीतरना गत चमकाले लागनात. त्यामा लतादीदी म्हणजे काय सुऱ्याज व्हता गड्या.
त्या टाइमाले भारतमा नूरजहाँ नावनी गायिकाना आगाजा व्हता. देशनी भारत पाकिस्तान फाळणी झायी तवे नूरजहाँ पाकिस्तानमा न्हीगी गयी. तठे तिले नूरजहाँले पाकिस्तानी पुढारीसनी तरून्नम-ए-जन्नत, म्हणजे स्वर्गनी गायिका हाऊ किताब दिना! त्या नूरजहाँ ले टक्कर दिनी या खान्देश कन्यानी. नी खूप मोठं नाव दौलत कमाई.
आपला देशना सर्वोच्च पुरस्कार लता दीदीले भेटना. फ्रान्सनी त्यासना सर्वोच्च नागरी पुरस्कार दिदिले दिना. 6 ते नुसत्या डी-लिट डिगऱ्या (मानद पीएचड्या) भेटन्यात. गान कोकिळा नी दीदी या लोक पदव्या बी सेत. 36 भाषासना वर भाषासमा लता दीदीनी गाना म्हणेल सेत. पृथ्वीवर 24 तास आखंडपने कोणताना कोनता चॅनेवर दीदीना आवाज सुरुज ऱ्हास.
आशी हाई आपला थायनेरनी लता दीदी. तीना खान्देश नी अहिराणी वर जबर जीव व्हता. खान्देश नी अहिराणी बद्दल दीदीनी कोणतीबी मुलाखत दखा. त्या हमेशा आमचं खान्देश आमची अहिराणी असाज वापर करेत.
बाप आजली ते काय त्यासले आठस नही, पन थायनेरनी माय आजलीन गच्ची पिरिम त्यासले भेटणं. दीदीन 6 वी नी 7 वी न शिक्षण आपला थायनेरमा झाय. धलमायना नातमा खूप जीव व्हता. धली दिनभर दीदीले अहिराणी गाना म्हनी दाये. खान्देशमा लगीनमा गनज अहिराणी गाना हिंदी मराठी गाना सारखा सेत. त्या गाना खान्देशी भाषामा सेत. या खान्देशी गाना लता दीदी मोठं मोठला संगीतकारसले ऐकाडे. मंग त्यासले लाईसनी काही गितकारसनी हिंदी मराठी गाना लिखात. संगीतकारसनी त्या चालीसवर गाना बनाडात नी त्या जबर हिट बी झायात. त्याम्हाना काही गाना सांगास,
*मेरी पतली कमर लंबेबाल देख रावजी।*
या गांनावर जबरदस्त हिट हिंदी गान 1966-67 मा गाजन व्हत. सिनमा *मेरे लाल.* देव कुमार हिरो व्हता. डाकूनी भूमीकामा. इंद्राणी मुखर्जी हिरोनी. इंद्राणी मुखर्जीना डान्स व्हता. दिदींना आवाज व्हता,
*मेरी पतली कमर लंबे बाल रे।*
*सावरिया मै थाडी रहू का चली जावं रे।*
खूप हिट झाय हाई गान. असा बराज अहिराणी चालवर गाना सेत.
एक सावा काय झाय?, बठा चित्रपट निर्मातासनी काही तरी मागणी व्हती सरकारकडे. पन सरकार काई आयके नही. तवे भारतमा दूरदर्शन हाई एकज चॅनेल व्हत. सरकार आपल्या मागण्या मान्य करत नही मंग निर्मातासनी दूरदर्शन वर बहिष्कार टाका. Tv वर पिक्चर बी नी पिक्चरना गाना बी बंद करी दिनात. मंग आते दखाडो काय? ते दूरदर्शन वालासनी लता दीदीनी एक दीर्घ मुलाखत दाई. मुलाखत लेनार प्रिया तेंडुलकर व्हती. खूप भारी मुलाखत से. यामा दीदी, खान्देशना अहिराणी गाना, थायनेर नी थायनेरनी माय आजली यावर खूप बोलेल से.
तुमले *जैत रे जैत* हाऊ मराठी पिक्चर आठस का? यांना गाना खूप हिट झायात. निर्माती नी गायिका लता दीदी, गीतकार ना धो महानोर, संगीतकार हृदयनाथ मंगेशकर हिरोनी स्मिता पाटील. या बठा खान्देशी व्हतात. गाना नी संगीत ते बी बठ खान्देशीज.
*आयलाड पैलाड दामुजी सोनार।*
*त्यांनी का घडली तोडीयाच जोड।।*
*घ्याना घ्याना बाई कसी घेऊ दादा।*
*घरी नंदा जावा करतील माजा हेवा।।*
हाई आख्ख गान खान्देशी गौराईन से. ते जस नी तस लेयल से. सध्या व्हाट्स अँप वर लता दीदीन्या गनज क्लिपा फिरी ऱ्हायन्यात त्याम्हान एक गान सांगास,
*सक्करका गारा खुंदाई दे सिपैया।*
*बर्फीका वटा बंधाई दे सिपैया।।*
ती शिपाईले सांगास की, साकरना गारा खुंदी दे, नी माले बर्फीना वट्टा बनाडी दे.
*शेवंतीका डकसा लागा दे सिपैया।*
*जिलबीकी खिडकी बनाई दे सिपैया।।*"
म्हणजे सिपाइ दादा दारसे शेवंतीनी फांटी लाइ दे नी जिलेबीनी खिडकी बनाडी दे.
तुम्ही बाल गीतेसमा एक गाणं ऐकेल से का?
*असावा सुंदर चॉकलेटचा बंगला।*
बठा परदेशी माल. चॉकलेट परदेशी, बंगला परदेशी ते बी आते. पण आपला खान्देशन कितल मस्तंग जूना जमानान बाल गीत से. अस्सल देशी घी मा देशी मिठाई! झक मारस तिना पुढे युरोपीन चॉकलेट!
अशी हाई खान्देश कन्या गान सम्राज्ञी ज्यारोज सोडी गयी त्यारोज, खान्देशनी माती घयघय रडनी, नी तापी मायन पानी थायनेरमा गुरमयन, तापी रडनी तिना आसू तिनाज पानीमा व्हाई ग्यात, त्या कोनलेज दिखनात नही. थायनेरना त्या घरमा जठे दीदी खेयनी, हासनी रडनी, रुसनी, फुगनी, धलं मायना मांगे गुरूगुरू रवनी तठे दीदीन स्मारक भांदो आशी मनी आमना से. त्यामुये दीदीन मम्हांर थायनेर खान्देश नी दीदी यासन नात टिकी ऱ्हाई!😭😭
*बापू हटकर*
उत्तरमहाराष्ट्र खान्देश विकास मंडळ.
😭🌊😭🎤😭🌊😭🎤😭🌊😭🎤🎤
टिप्पण्या
टिप्पणी पोस्ट करा